政情：大嘥鬼盡在立會
「大嘥鬼」愈揭愈多！有環保團體去年七月搞咗個「減廢約章」行動，邀請一班立法會議員、區議員及政府機構簽署承諾減少浪費。起初，唔少議員都自命「環保大使」，點知最後大家都「走晒數」，七十個立法會議員當中，只有十一個人肯簽署。長春社理事鍾姍姍仲踢爆自由黨講一套做一套，口口聲聲話願意為環境作出承擔，但實際上一直都唔肯停送紀念品，最後造成唔少浪費，認真係大嘥鬼。
垃圾桶「起出」全新女裝鞋
長春社過去一直接觸唔少議員、機構，希望佢哋帶頭實踐減廢，鼓勵社會支持環保，呢段路程可謂荊棘滿途。就連立法會秘書長陳維安都提醒過長春社，話呢個行動「好似冇咩報道價值」，怕冇咩議員肯瞓身支持。結果，除咗響應嘅立會議員寥寥無幾外，五百零七個區議員入面，僅有四十一個人表態支持，人數少得可憐！好似民主黨咁，一班立法會議員全部冇晒影，唔知佢哋究竟去咗邊呢？
長春社早前去過立法會大樓檢查過議員辦公室啲垃圾，踢爆好多出人意表嘅事。鍾姍姍話，立法會九樓可謂「大嘥鬼」重災區，皆因垃圾桶裏面除咗有好多剩食外，仲畀佢哋搵到一對全新無用過嘅女裝拖鞋！佢指摘有議員毫無環保意識，「對廢物運輸、處理程序無理解，好難叫人相信佢哋有心推動環保政策！」
奶茶未飲晒就成杯丟棄
另外，有好多議員「鍾情」外賣奶茶，但往往未飲晒就成杯丟落垃圾桶，將液體同固體廢物撈埋一齊，原來呢個係令垃圾車傳出陣陣惡臭嘅原因，認真影響市容！佢語重心長奉勸一班議員，學習正確廢物處理方法，否則只會造成更多社會問題。
政府方面，力推「惜食運動」嘅環境局並冇簽到約章，反而局長黃錦星就以個人名義支持。據聞因為好多政策由前朝定落，搞到依家局方要改善都要嘥好多時間處理。唉！講到尾，咪又係「貪曾」前特首曾蔭權爵士做落嘅衰嘢囉，連累今屆政府執手尾，認真累人累物。