政情：啟剛爆12歲被「賣豬仔」

難忘留學英國 苦盡甘來

啟剛話，當年讀完小六，只係十二歲仔就無啦啦被父母「賣豬仔」去英國寄宿學校讀書，記住佢係用「賣豬仔」呢個字眼，證明佢都唔係好接受呢個安排。去到英國，年紀輕輕嘅啟剛英文唔得，人生路不熟，喺學校第一晚有個「電影之夜」，佢記得當年只係識睇周星馳，邊聽得明英文電影吖，估唔到第一晚已經咁慘情。

唔止睇戲碰灰，啟剛仲自爆有一次英國地理科考試，要喺英國地圖上填上四十八個郡名，但佢一個都唔識，結果當然零分啦。之後佢為咗追上其他同學成績，惟有人哋踢波去玩，佢就要匿埋補習。雖然咁慘，但啟剛話自己冇唔開心，因為佢最叻係數學，而且贏晒其他同學，所以佢鼓勵學生記得發掘自己興趣，唔好埋沒才華喎。