「貪曾」前特首曾蔭權爵士及「貪湯」前廉政專員湯顯明呢對「絕代雙貪」種下嘅貪腐歪風，不但累己累人，更連累新一份《施政報告》都要為雙貪嘅連串惡行「補鑊」，認真佗衰家。今年《施政報告》綱領罕有增設「加強肅貪工作」章節，以逾二百字簡介廉政公署將協助政府部門同公營機構檢討紀律守則，兼要加強廉署內部監控工作。政府消息仲話，公務員事務局已着手為政府各部門草擬送禮指引，不日內公布詳情。公務員以後想學貪湯側側膊以牛腩、魚蛋送禮都唔使旨意，問過公務員一哥鄧國威先啦！
