中環出更：豪撐漁農業 高永文「夠薑」
旺角花墟前日起舉行一連三日嘅本地漁農美食嘉年華，一向着重飲食健康嘅食物及衞生局局長高永文，尋日都喺百忙中抽時間去捧場，仲一口氣豪花二千幾蚊掃貨，當中包括一舊足足有成呎長嘅巨型本地薑。卓妮問佢點解要買咁大舊薑，佢就好簡潔咁答︰「夠薑囉！」
掃本地產品滿載歸
高永文尋日出席完嘉年華開幕禮後，喺多個攤檔行咗一陣，就掃咗唔少戰利品，包括有機密瓜、食用菇、煲湯藥、一條本地飼養嘅石斑等，但當中最矚目嘅，就首推一舊巨型本地薑。見慣大場面嘅高永文，去到嗰檔賣薑嘅攤檔前，就畀佢哋大大舊嘅本地薑吸引，即刻捧起嚟感受下舊薑有幾重，之後就拎荷包畀錢。
講開本地漁農業，食衞局前日向立法會財委會申請五億元漁業基金撥款，就差啲畀自由黨聯同泛民否決。卓妮問高永文覺唔覺得自由黨有意就司局級官員杯葛該黨黨慶報仇，佢自言唔會去猜測對方動機，亦唔會因為咁而一肚氣，最重要係喺食衞局嘅政治團隊努力下，總算渡過咗呢次難關喎。
卓妮