政情：「唔追唔還」 夢熊仲有排煩
前全國政協委員劉夢熊近期官司纏身，早幾日又因為幫一名女子做按揭擔保人，對方供樓欠款，令佢被銀行追數。不過，我哋尋日下午仲見到劉夢熊去咗中環置地廣場飲下午茶，睇落仲冇乜事添。原來佢啱啱尋日搞掂晒銀行筆欠債，銀行因而取消咗法律行動，真係十足債仔性格「唔追唔還」囉！不過，佢咪以為還清筆數就好得戚，因為佢仲有涉嫌東方明珠石油洗錢案及涉嫌妨礙司法公正兩單案件纏身，睇嚟佢仲有排煩。
我哋尋日兩點幾鐘見到劉夢熊，同一名男子飲下午茶，唔知話題係咪好吸引，連侍應都走埋去齊齊傾偈。當時佢傾到手舞足蹈，又指手畫腳咁，最後傾咗成粒鐘先至埋單走人。劉夢熊話，近日搞掂供樓欠款同筆律師費，尋日朝早銀行確認收到佢張本票，因而取消法律行動，件事「妥善解決」喎，但就唔肯透露擔保金額。
受訪變「錄音機」
不過，當我哋問佢同嗰名女子嘅關係，劉夢熊就好似變咗「人肉錄音機」，兩度話「我係擔保人，佢係按揭申請人」，冇正面回應同事主係咩關係，就一支箭咁離開。