中環出更：on.cc東網效率高 名人讚不絕口
由城中青年才俊組成嘅百仁基金尋日喺金鐘港麗酒店舉行就職典禮，理文造紙主席李文俊（Raymond）冧莊做多屆主席，過百政商界名人都有捧場。卓妮尋日亦喺現場直擊成個活動過程，仲即時分段上載到東方報業集團旗艦網站「on.cc東網」，主人家Raymond睇到都忍唔住大讚「on.cc東網」效率快，會長施榮忻亦讚不絕口，話希望多啲後生仔睇到之後可以加入百仁基金大家庭喎。
除左主席Raymond、創會會長李家傑外，特首梁振英（CY）同部分官員都有出席捧場，包括全國人大常委范徐麗泰、勞工及福利局局長張建宗、政制及內地事務局局長譚志源等。Raymond話，百仁基金繼續以青少年發展為重點，希望嚟緊可以安排機會畀啲後生仔到基金會員嘅公司實習。
李文俊冧莊 羅詠詩加入
臨近農曆年尾，唔少名人都會出外旅遊，李家傑透露會喺農曆新年同爸爸恒基地產主席李兆基、細佬李家誠、家姐同細妹一齊去旅行，三代一齊出動，咁咪有成二、三十人？但佢話唔止添呀！至於去邊度玩，佢就唔肯透露喇。
卓妮同場仲見到首次加入基金做副主席嘅羅詠詩（Anthea）及即將添丁嘅副主席楊華勇（Johnny）。Johnny話，太太在家專心養胎，問佢會唔會再追多個，佢就話已經有一個屬龍嘅大女，今年馬年將會生個「馬」仔，湊埋一個「好」字之餘，剛好「龍馬精神」，夠晒好意頭，所以現階段冇諗，再部署吓先喎。
卓妮