政情：八網難逃：星屑醫生同劉嗡「預言」成真

人民力量成員「星屑醫生」歐陽英傑早喺九十年代已預示自己會行醫？星屑醫生同人力前主席劉嘉鴻（劉嗡），除咗曾分屬黨友兼拔萃男書院同窗外，當年亦曾為即席專題演講比賽爭個你死我活。有網友尋日喺社交網站上載一篇一九九一年嘅剪報，大字標題報道歐陽英傑憑題目「急症室」喺演講比賽奪冠，而劉嗡就係同屆比賽嘅雙季軍之一。呢篇「潮文」除咗令網友議論紛紛外，仲有人問星屑醫生當年已經講「急症室」，係咪預示自己會行醫生呢條路呢？而劉嗡以「鑽石」為題，就走咗去讀數學，但至今依然係「鑽石王老五」。