政情：徐悲鴻作品展 張永霖導賞
國寶級美術大師徐悲鴻，因擅長畫馬而名聞遐邇。屯門市廣場因馬年將至，下星期開始展出徐悲鴻嘅經典遺作與幾幅過往從未曝光嘅作品，真係彌足珍貴。本身亦有珍藏大師作品嘅藝術品收藏家、明德校董會主席張永霖（Linus）尋日就喺預展中擔任導賞員，除咗向觀眾道出大師生平與作品特色外，仲話當今藝術品市場真假難辨，真係好考眼光。
市面贋品充斥 籲小心投資
Linus話，自從內地經濟起飛，藝術品市場就熱火朝天，就連來歷不明嘅畫作亦可高價賣出。而今次展覽嘅徐悲鴻遺作全部有來源有出處，倘若交付市場拍賣肯定售價不菲，例如場內一幅徐悲鴻嘅「奔馬圖」，Linus就估計起碼值港幣六千萬元。由於利之所至，市場上贋品充斥，一個不留神隨時中招，收藏家投資前就要做足功課喇。
雖然Linus自言投身藝術收藏多時算是薄有經驗，但仍有購入假貨嘅慘痛經歷，所以佢每當發現心儀畫作，必定搵高手鑑別後才作決定。