政情：范國威鼓吹公投 疑報私仇
學民思潮發起五區辭職變相公投運動，要求泛民主派每區派出一個議員辭職，借公投測試市民對公民提名嘅支持度，各黨派都持觀望態度，唔敢玩過火。就喺呢個時候，新民主同盟范國威（Gary）就拋出「超級議員辭職」公投方案，仲點名要求民主黨（白鴿黨）超級議員何俊仁（鐵頭仁）辭職。Gary表面上就話唔想影響各黨嘅部署同地區工作，但係都唔知係咪想借公投去公報私仇，一雪當年黯然退出白鴿黨嘅前恥。
促（先刀）雞放棄參選海怡西
Gary尋日特登開記者會介紹佢嘅公投方案，就係要求循超級區議會當選為立法會議員嘅鐵頭仁立即辭職，以便啟動公投程序，再由公民黨現任主席余若薇接棒參選。不過，余若薇本身唔係區議員，為咗佢成功取得超級區議會入場券，Gary不惜要求準備參選南區區議會海怡西補選嘅單仲偕（(先刀)雞）退出，等余若薇頂上。Gary仲不惜聯絡同樣有意參選嘅人民力量主席袁彌明，對方亦欣然接受Gary建議，讓路畀余若薇參選。
好多人都講過超級議員辭職公投冇五區總辭咁有代表性，因為有成幾十萬功能界別嘅選民冇份投票，咁點解Gary仲要提倡超級議員辭職呢？佢就話單一選區比起五區可以更能聚焦市民眼球，可以進一步彰顯民意喎。佢話白鴿黨喺一○年政改一役違背部分選民意願，加上佢哋曾經講過超級議席並唔可以千秋萬世存在落去，鐵頭仁辭職除咗可以重拾白鴿黨嘅道德感召力之餘，仲可以重拾選民支持。
要白鴿黨讓位畀公文袋
不過，Gary今次好明顯係想進一步將白鴿黨連根拔起，事關佢要求白鴿黨將議席讓畀對家公民黨已經唔知想點，而單仲偕係白鴿黨參選下屆超級議員嘅希望之一，但Gary竟然連佢都唔放過，要佢放棄參加區議會補選，擺明係想藉機削弱白鴿黨喺政治舞台上嘅影響力。至於作為新界東議員嘅Gary會唔會響應辭職公投？佢就話現階段會全力推動鐵頭仁辭職，但佢哋都會積極考慮辭職喎。究竟點積極法呢？咁就得佢自己至知喇。