政情：阿一遷舖政商食客到賀
「阿一」楊貫一主理嘅富臨飯店，自去年不敵貴租而要搵地方搬遷，尋日終於喺舊舖附近嘅信和廣場重新開業，論環境同面積都更勝從前。由於唔少政商名人都係阿一嘅捧場客，好多都畀面出席新舖啟業儀式，好似前經濟發展及勞工局局長葉澍堃就同細仔葉瀚華到賀，仲話喺年初四訂枱食飯添。而福建幫頭領施子清就盛讚阿一嘅馬拉糕同叉燒酥等點心都精心製作，確係佢飲茶食飯之選。
至於中華廠商聯合會青委林凱章就話，新店景觀甚佳，係佢同老友摸酒杯底嘅好地方。阿一透露，新店豪花逾二千萬元裝修，地方比舊店大好多，希望客人食得舒服。
飲食業界呻租貴
由於阿一係飲食業界老行尊，好多業界老闆都有到賀。其中稻苗學會永遠名譽會長胡珠就話，多數飲食業界都面對舖位租金高昂問題，所以業主真係要體諒吓飲食業嘅苦況。人稱「幟哥」嘅黃永幟亦持相同觀點，佢話除咗舖租，仲擔心強積金對沖機制一旦取消，就會加重老闆嘅負擔，到頭來要加價以彌補開支咁話。