政情：《同舟之情》別有內情
去年四月政府搞咗個「家是香港」運動，話要向香港注入正能量，搞呢類活動唔少得要作番首主題曲。之但係政府之前為不同嘅大騷作過幾首歌，劣評如潮，好似特區政府成立十周年嘅《香港始終有你》，仲畀網民攞嚟改埋歌詞，下場不堪入目。不過今次「家是香港」主題曲《同舟之情》似乎就幾令人受落，最近人氣急升嘅填詞人陳詠謙尋日喺電台節目上，大爆某高官睇到歌詞後流眼淚嘅秘辛。
將中港矛盾血淋淋咁描寫
陳詠謙話，當初收到邀請嘅第一個反應係有壓力，因為呢個時勢幫政府做嘢，容乜易畀人話係親政府嘅人。但係諗深一層，首歌係寫畀香港人嘅，所以最後都接受邀請。佢話，政府唯一畀佢嘅指引就係自己發揮，唔使特登唱好香港，真實反映就得。
陳寫完第一稿之後，得到嘅回應係「寫得好好」，仲聽講「負責把關人」睇到喊添，之不過佢冇透露「把關人」身份喇。點解要喊？原來唔係太感動，而係歌詞太悲傷、消極。話說首歌第一句原本係「少不免會流淚 該怎麼走下去」，第三四句就係「一家親 親到醞釀矛盾 開始以敵人自居 同舟之情 由珍惜到粉碎」，將中港矛盾血淋淋咁寫出嚟，唔怪得之有人睇到喊喇！於是呢幾句有啲被刪除，有啲略作潤飾。
作品遭修改 不覺被「河蟹」
咁佢有冇被「河蟹」嘅感覺？陳詠謙話冇喎，亦冇唔開心，佢認同一件事可以兩面睇，毋須不斷渲染負能量，事關首歌係作畀大眾聽，係應該樂觀啲嘅。佢話，把關人亦曾要求佢修改另一部分歌詞，但係佢認為改咗就會唔通順，所以堅持不改，結果對方亦從善如流。咁政府有冇再搵佢填詞？佢就話未收到風，若果獲邀都會盡公民責任幫手喎。咁咪係囉！其實使乜怕同政府做嘢，只要憑自己信念去做，為社會散播正能量，都係件好事吖！