政情：大師施髮術 長者變年輕
星級髮型大師Kim Robinson尋日帶領旗下嘅髮型師團隊，教在囚人士為長者理髮。雖然阿Kim今次嘅角色係指導性質，不過大師出場，點都要露兩手，即場為一位長者形象大改造，為佢將長髮剪短。
據懲教署署長單日堅講，哥連臣角懲教所每個月都會派幾位正在學習理髮技巧嘅在囚人士，到耆康會轄下嘅柴灣長者地區中心為長者義務理髮，咁啱阿Kim又有意做吓義工，打算免費為長者理髮，於是大家一拍即合。阿Kim今次今次為一位年逾六旬嘅陳女士理髮，阿Kim見對方長髮過肩，大膽決定塑以一頭短髮，當陳女士仍然心大心細，阿Kim一邊用廣東話大讚「你好靚」，然後三扒兩撥就為陳女士剪出一個清爽怡人嘅新髮型。
陳女士見到自己嘅新形象，大讚阿Kim技巧了得，話令佢外表年輕咗三十年喎！在場賓客都盛讚阿Kim只憑噴壺同鉸剪等工具就為客人塑造新髮型，星級髮型師稱號當之無愧。