政情：「電子大王」轉攻房地產
全球經濟表現反覆，搵錢唔容易。「電子大王」顧明均都大叫生意難做，繼舊年結束無錫廠房後，今年亦將深圳廠房拉閘，遣散埋四千多名員工。忍痛結業，全因經營電子業成本高利潤薄，無利可圖。顧老闆話，寧願將塊地用來發展房地產生意，效益仲大喎。
宣布急流勇退嘅顧老闆係電子業界翹楚，白手興家喺商界打滾多年，經歷無數風浪。佢笑言人生到呢個階段，已進入退休狀態，去年已部署淡出，先將無錫電子廠結束，遣散五千多名員工，今年將進一步結束深圳廠房。要同四千幾名員工講「分手」，顧老闆話好唔捨得。
不過生意歸生意，賣仔就莫摸頭，佢已度好成盤轉型大計，今年進軍房地產戰場，事關兩塊廠房地皮規模唔細，分別有五十幾萬呎及百幾萬呎，用來發展酒店、商場及住宅等項目，應該大有可為。
既然退休，何解唔索性賣咗塊地？顧老闆分析道：「齋出售地皮，唔賺得幾多。不如將佢開發成一個綜合地產項目，價值高好多。」顧老闆數口精，經佢計過，唔使精算師喇。