政情：北區幼園荒 施俊輝口輕輕
北區學額供應緊張，唔少家長通宵排隊都撲唔到學位。民主黨尋日喺上水舉辦北區學位規劃論壇，正當眾人鬧爆教育局唔肯及早掌握跨境學童數據時，該局嘅政治助理施俊輝（Jeff）竟然話北區學位供應不足係由於市場供求失衡，仲呼籲辦學團體去北區開辦幼稚園善用商機喎，都講得幾輕鬆吖。
跨境學童數據難估計
葉建源話，近年幼稚園入讀率不斷增長，北區入學率由○五年嘅七成上升至去年嘅九成五，認為情況已經響起警號，促請教育局及早準備。白鴿黨主席劉慧卿就話教育局局長吳克儉處理跨境學童問題真係「差到無人有」，又話自己喺立法會多次用「吳得掂」嚟稱呼吳克儉，但其他議員都無乜反應，證明大家已經習以為常。
Jeff就承認當局難以估算跨境學童返香港讀書嘅時間和數字，令規劃存在限制，之後就補鑊話教育局自去年起推出小學派位分流措施，令學生毋須跨區返學。佢又施施然地話理解北區家長撲唔到學位嘅心情，因為就連局方都唔知每年會有幾多跨境學童嚟香港讀書。