政情：政改宣傳落區惹誤會
政改諮詢期開始咗一個月，一眾高官尋日開始落區諮詢，面對面向街坊派發政改宣傳單張。頭炮由政制及內地事務局局長譚志源帶隊，副局長劉江華同政治助理陳岳鵬都有份幫手。三人親和力十足，無論大人小朋友都唔放過。但觀乎尋日落區情況，似乎唔少香港人仲未清楚政改講乜，更加唔好講對提名委員會、入閘門檻有咩睇法啦。有街坊仲以為尋日係特首選舉拉票，仲問點解咁快又選特首o架？睇怕政府要落多幾次區，市民先知政改殺到埋身喇。
派傳單遇「女長毛」示威
譚志源一行幾人尋日拉隊到香港仔宣傳政改，唔知係咪因為香港仔屬建制派地盤，尋日完全唔見有警察護航。點知派單張期間殺出「女長毛」雷玉蓮示威，周圍嘅「市民」隨即制服女長毛，原來佢哋唔係普通市民，大量便衣探員晨早滿布四周。
落區嘅整體過程總算順利，絕大部分市民都樂意接收政改宣傳單張，仲猛叫譚志源加油。班街坊熱情度十足，但可惜唔係個個知呢班高官落香港仔做乜。例如宣傳單張上印有政改三人組嗰樣，有婆婆接過單張後，猛問工作人員係咪呢三個人選特首，仲話中間個女人幾好樣咁，搞到工作人員即刻澄清，話今次係政改諮詢，唔係選特首，但啲婆婆似乎唔太明「政改」到底係邊科，一臉疑惑走人。
劉肉緊嗌咪 譚耐心解釋
另一位伯伯亦非常留心官員講解，無論譚志源講乜都點頭答好，有記者問佢譚志源做特首好唔好呀，伯伯都話好，睇嚟佢真係好支持政府。除咗譚志源，選舉經驗豐富嘅劉江華都被人誤會，佢一拎住個大聲公就選舉狀態上身，不停話「大家好，我係劉江華，我哋需要你哋嘅支持」，十足十選舉告急時拉票，搞到唔少市民都以為係劉江華選特首。
既然班公公婆婆唔太清楚，精甩尾嘅譚志源就惟有轉攻小朋友，咁啱又有兩位乖巧小朋友經過，譚志源就由頭解釋一次政改畀兩位知。雖然兩位小朋友聽完都係一頭霧水，但譚志源都好有耐性解釋，成功幫政府加分。其實呢類型地區諮詢，實際作用未必好大，但起碼能夠顯示政府誠意同決心，所以政府不妨搞多幾次落區，話唔定民意分分鐘上升。