中環出更：蔣麗芸被圍攻 自我感覺良好
繼立法會議員鍾樹根嘅「肯肯定」同「浪浪費」金句後，立法會另一女將蔣麗芸（Ann）尋日亦喺城市論壇發表出位言論，話香港雖然未有一人一票選特首，但民主程度相比亞洲其他地方優勝，隨即畀台下觀眾插爆。雖然阿Ann慘被眾人圍攻，難得佢仍然自我感覺良好，話大家猛問佢問題都係想佢有多啲曝光率，真係唔讚佢超級阿Q都唔得。
工黨李卓人（阿人）喺論壇上批評政改諮詢唔肯討論公民提名，證明政府無誠意諮詢市民意見。阿Ann聽完反串阿人想法負面，話最終方案一日未出爐，都唔可以鬧政府係假諮詢。佢之後仲愈講愈興奮，慨嘆即使西方國家選舉都有篩選，聲言喺香港實行普選會製造唔少事端。
同場有講者直斥阿Ann言論離譜，問佢既然話香港民主程度高，咁到底係好過緬甸定菲律賓先？阿Ann於是就引述美國非政府組織自由之家嘅數據，話香港民主程度喺亞洲區排名第一，又話美國前中情局職員斯諾登之所以揀香港作落腳之地，都係因為香港係全世界最自由嘅地方。
卓妮