中環出更：名人無懼禽流 過年照食雞
禽流感陰霾捲土重來，加上內地出現致命個案，唔少食家聞雞色變。不過城中名人就話冇有怕，話只要將雞煮熟啲，今個新春團年飯，大肥雞少不了，咁至好意頭。
過年食雞，係中國人習俗，撞正禽流感再肆虐，新春食唔食雞好，都係大考驗。「飼料大王」陳幼南（Ian）尋日現身沙田馬場，帶頭「撐」食雞，佢慨嘆受疫情影響，食雞人數減少一至兩成，影響所及，雞隻飼料銷情亦應聲下跌，令佢好頭痛。Ian對點樣食雞先最安全，有滿肚心得：「煮熟啲就得嘞！」所以新年期間，一樣雞照食，仲話與家人敍餐，都會第一個夾雞食。
「煮熟啲就唔怕」
近排感冒到幾乎失聲嘅港大校務委員會主席梁智鴻，都對食雞情有獨鍾：「我唔怕喎，大家煮雞時，整熟就唔怕嘞。」青年事務委員會主席陳振彬都「撐」食雞有理：「我哋潮州人過年，點可以冇雞食o架！」佢大讚潮式雞好正，喺煮雞時加入少許鹽，鹹鹹哋，好好味。
不過唔係人人都對食雞百分百放心，九龍樂善堂主席韓世灝就擔心疫情一日未消退，都係暫時少食為妙，旗下機構有提供膳食畀老人家，亦會因應營養師意見，暫時煮少啲雞。近排坊間假金牛猖獗，收善款時會否中招？韓主席話，幸好善長多數寫支票，唔怕收到假鈔。
卓妮