政情：中環出更：愛你一世 名人輪流添丁
踏進二○一四年，社交圈多位名人B排隊出世，最早跑出，應該係菁英會主席梁宏正首位公子。「梁B」將於本月中出世，趕得切喺農曆新年逗利是；菁英會成員鄺晶晶，亦喺二月底首次榮升做媽咪；咁蹺菁英會榮譽主席楊華勇亦再次添丁。卓妮仲知道，恒生銀行前女大班梁高美懿（Margaret）嘅細女Angela，都已有身孕六個多月，梁太好快榮升外婆，恭喜恭喜！
Margaret淡出銀行界後，疊埋心水同牙醫老公梁承達享受退休生活，不過今年將加插一個新節目，就係湊孫。梁生透露，細女懷有身孕，係仔定女就保持神秘。首次做外公，梁生心情靚爆，期待孫兒快啲來臨；梁太講起抱孫就笑唔停，幸福盡在不言中。
鄺晶晶肥肚唔肥人
初為人母嘅鄺晶晶，就話心情緊張，七個月前請定陪月員，又因為怕順產太痛，個多星期前突然改變主意想開刀，幸好床位未滿，最終擇定二月底吉日剖腹。晶晶已為囡囡改定英文名Annabelle，寓意上天嘅禮物。臨盆在即，晶晶只重咗十六磅，佢笑言係肥肚唔肥人，朋友見佢佗得咁輕盈，猜佢腹中寶寶可能係仔都未定喎。
與晶晶情如姊妹嘅楊華勇太太莊菲娜（Fiona），亦喺社交網宣布有喜。去年初誕下囡囡嘅Fiona，今胎懷男嬰，預產期為五月，名副其實湊成一個好字。楊華勇早前曾自嘲年紀唔細，有仔趁嫩生，話口未完「造人」成功，仲係三年抱兩，果然講得出做得到，但相信最開心嘅係佢爸爸楊孫西。
卓妮