政情：三年抱三 怪醫多B嚟密啲手
政府嘅人口政策鼓勵港人生多幾個，綽號「怪醫」嘅立法會醫學界議員梁家騮就以三年抱三嚟瞓身支持，大仔同二女先後喺一二年初同年底出世，而今年就會做第三任爸爸。梁太Cannas依家已腹大便便，預計女兒會喺二月中出世，真係可喜可賀。原本諗住生完二女就收工嘅怪醫話，生小朋友都係隨緣，無計劃要生幾多個，只要小生命嚟到世界，佢就預備迎接喇。
做到八十歲先退休
太太臨盆在即，怪醫已經搵定陪月員，在女兒出世後照顧太太，但要養三個心肝寶貝，都咪話唔重皮。不過，佢一於好少理，疊埋心水做到八十歲先退休。佢話，生三個比生一個慳錢，屋企啲BB衫一個着完到一個着，玩具又可以輪住玩，一定唔會嘥，而且佢一定唔會做怪獸家長，唔會嘥錢為子女報大量興趣班催谷，寧願抽多啲時間陪佢哋玩，慳錢之餘，大家關係仲親密。
講到生BB，家長最驚搶唔到奶粉，但怪醫認為冇問題。佢話隻隻奶粉差唔多，用啲冇咁多人搶嘅牌子，保證冇缺貨，仔女一定食飽飽。