政情：訪懲教職訓中心 鄧家彪試食
勞工界立法會議員鄧家彪（Bill）尋日喺懲教署助理署長胡英明嘅陪同下，參觀大嶼山塘福懲教所，話要就人口政策、釋放本地勞動力嘅問題作深入探討喎。佢哋一行十一人主要參觀懲教所其中兩個職業訓練中心，仲品嘗訓練過兩個月嘅中廚部學員手藝添。阿Bill話，喺無火煮食嘅環境下，算好好味，而美中不足嘅係炒飯嘅飯冇隔夜喎。
講到啲食物咁好味，係咪電話或相機都有份食先？阿Bill就話，喺懲教所入面唔可以輕易影相，之後又因為食得開心過頭，唔記得影相喎。依家好多議員都識得上載活動相片到社交網站做宣傳，如果阿Bill將來要直選，影相真係唔懶得，好彩今次政府有上載照片。
阿Bill透露，計劃喺復活節前後再去大欖懲教所參觀，睇吓嗰度嘅紮鐵等培訓課程，以監察政府各部門都有就推動社會勞動力做足工作喎。