立法會議員仲放緊聖誕節同新年假期，但尋日立法會就公布咗兩條議員會喺復會後提出嘅緊急口頭質詢或休會辯論議案。其中批發及零售界方剛同議員單仲偕（（先刂）雞）就分別就終審法院去年判決嘅綜援案，以及近日社會出現嘅偽鈔事件提緊急休會辯論及口頭質詢。其實兩件事都唔算新鮮事，點解依家先至緊急去討論呢？所以睇怕都係博出位居多。
立法會尋日上載議員向內務委員會提出申請，要求於本月八日立法會大會提出緊急口頭質詢及休會辯論。當中發現（先刂）雞嘅申請同偽鈔事件有關，問政府會否全面回收○三年版一千元紙幣，以及應對問題嘅時間表喎。
至於方剛就終審法院去年十二月裁定，申領綜援須符合居港七年屬違憲嘅案件提緊急休會辯論。其實銀行已就偽鈔事件作出應對措施，而綜援案亦已由新聞變舊聞喇。