政情：中環出更：施子清三代同堂歡度除夕
每年除夕到新年，城中名人各有消遣樂。尋日午膳時間，子孫滿堂嘅福建幫頭領施子清夫婦現身銅鑼灣名人飯堂，施家四兄弟榮怡、榮懷（Irons）、榮恒同榮忻齊晒腳，加埋四位靚新抱及孫仔孫女合共十幾人，一張枱坐到爆晒，十分熱鬧。期間佢哋巧遇喺度食飯嘅前博愛醫院副主席吳俊華（James），眾人親熱寒暄問候，原來兩家人係相識逾半世紀嘅世交。
身兼中華廠商聯合會會長嘅施家老二Irons一見到James，即刻對James玫瑰園大宅喺聖誕節被爆竊表示關心。Irons話，佢哋都係福建人，James讀小學時，係佢爸爸施子清嘅學生，而Irons就同James嘅細佬係小學同學，所以大家關係好密切，十分難得。
講番尋日飯敍，原來係施家老大榮怡買咗條靚魚，特登拎畀嚟師傅炮製。Irons細仔亦喺美國返嚟度歲，難得一家咁齊人，所以咪聚埋食晏飲茶。至於昨晚，佢哋全家人亦再聚埋食飯，齊齊倒數送舊迎新。
飯敍巧遇吳俊華
James講起屋企爆竊案仍好勞氣，佢話件事最激氣唔係損失逾一百六十萬元財物，而係每戶業主一個月交嘅管理費用高達一萬八千八百元，但仍發生爆竊案，眾業主正商量對策，確保唔會再有人被賊人光顧。
飯後卓妮去中環閒逛，喺歷山大廈一間咖啡店遇見利豐集團榮譽主席馮國經好悠閒咁歎茶，冇耐就有一位朋友前去會合，期間馮國經仲好似簽文件咁認真。除夕都咁勤力做嘢，難怪利豐歷經百年都仲咁硬淨喇。
卓妮