成功人士會同大家講一個致勝秘訣，就係專心做好每一件事。簡單嘅事情重複做，你就係專家。重複嘅事情用心做，你就係贏家。若然做事唔專心咯喎，閣下十居其九係輸家。
賽車如無意外係全世界獎金最多嘅運動項目，車手嘅成功關鍵係乜呢？咪就係重重複複做一個簡單動作囉——開車。至於車手所開嘅跑車，亦都重重複複做一個簡單動作——滾動。假如車手開車唔專心，後果隨時係好得人驚嘅四個字——車毀人亡。
功夫茶今日想同大家研究一個問題，的士司機雖然唔係車手，冇必要以時速三百公里疾駛馳騁，不過呢一個工種係唔係必須好專心去做事呢？答案當然係肯定o架啦，否則繼亡命小巴之外，又會出現亡命的士，唔專心開車嘅後果可大可小o架。
之但係今時今日出現咗好多一心幾用嘅的士司機，有人甚至係「一心十三用」，因為佢哋車頭位置放咗十三部手機。冇耐之前喎，有一位路見不平嘅的士司機睇唔過眼，將一名的士行家車頭擺放十三部手機嘅情況影低。拍攝者向本報表示，嗰架的士當時正在載客。本報記者致電嗰位一心十三用嘅的士司機啦，預約由佐敦前往大埔，得到嘅回覆係「睇下有冇司機」。過咗冇耐之後有另一名的士司機來電，話可以安排接載，而呢架的士車頭亦放咗六部手機。
講到呢度，聰明嘅讀者相信已經估到，唔專心駕駛嘅的士司機其實係「折扣黨」，提供減價優惠吸引乘客。折扣黨通常分工合作，阿甲有客就通知阿乙，阿乙有客就通知阿丙，阿丙有客又通知阿甲，再由阿甲通知阿丁。根據的士小巴權益關注大聯盟主席黎銘洪介紹，現時估計有六千部的士係折扣黨，佔全港的士三分一，司機一般會加入由幾十人集合嘅群組，向頭目繳交約一百元嘅月費就會得到分派生意，擁有十三部手機嘅相信就係頭目。
大家不妨想像一下，如果坐上一部車頭有十三部手機嘅的士，會唔會嚇到心膽俱寒呢？功夫茶自問唔算細膽，不過假如身處其中，或者都會驚到鼻哥窿都冇肉。你知啦，一個司機掛住接電話拉生意而唔專心開車係好恐怖o架，否則香港都唔會有法例禁止駕駛人士開車期間講電話啦。
講到法例，其實的士提供折扣已經係犯法啦，執法者有冇認真執法呀？至於禁止開車期間講電話嘅法例似乎過時咯喎，事關條文只針對「手持」電話，近年新興嘅輕觸式屏幕智能手機未能有效監管，就算告上法庭都有機會拗餐飽。
計功夫茶話齋，分心駕駛好易死o架，亡命的士潛在禍患無窮，唔該官老爺認真取締折扣黨，唔容許草菅人命！