政情：劉秀成一支鋼筆走天涯
本身是建築師的前立法會建築、測量及都市規劃界議員劉秀成熱愛攝影及速寫，任議員時多次以個人嘅速寫作品製成月曆贈予新知舊雨。卸任後，佢除咗繼續做好其建築專業外，仍到處旅行速寫，更義務教小朋友點樣透過一支鋼筆去記錄生活中所睇到嘅一幢樓及好風景等等。
速寫培養觀察力
劉秀成嘅速寫作品多不勝數，不少本港的古舊建築物及中國著名古蹟都係其筆下題材，三兩個月前佢先至同朋友去完武當山旅遊。佢話：「影相嚓一聲幾秒就完，速寫至少要幾分鐘，甚至一個鐘，可以培養觀察力同專注力。」
方氏基金會早幾個月前邀請佢擔任青年藝術發展計劃工作坊嘅導師，教兒童及青少年速寫，學生由七、八歲到十多歲都有。劉秀成會讓學生在畫室雕塑和畫靜物，也計劃帶他們到戶外練習，但太細個就唔帶喇，因為好難照顧。
除了教小朋友速寫，劉秀成仲重返香港大學教書，佢話自己七十歲了，教書可以常常和年輕人一起，覺得自己都年輕啲，開心啲。