政情：財爺動畫化 死性冇改過
財爺曾俊華做咗咁多年預算案諮詢，以前好興自己粉墨登場拍短片宣傳，今年佢就改為搵人拍動畫短片，聲言唔想再次變成「票房毒藥」嘅八股宣傳片。不過，單睇首集短片就似乎係想「靠嚇」居多，事關佢講到明要「有備無患」，話幾千億財政儲備除咗可以捍衞港元，仲講番十年前沙士一役，政府收入唔穩定，全靠食老本解困，暗示繼續會做守財奴，就算派少咗糖，都唔會被人掟蛋嘛！
暗示續做守財奴
財爺尋日喺網誌度話，以往短片用大氣電波播放，片長有限制，除咗呼籲市民發表意見，就好難增加其他內容，所以就開咗個YouTube頻道「Johnny財政博客」，整咗十段動畫短片，每條短片大概一分鐘，隔日上載，每集講解一個理財概念。唔知係咪以往多年啲短片被人惡搞得多，佢自嘲預期一班鍾意「二次創作」嘅網上高手可能因此感到失望，但又話見識過各路高人嘅大作，好期待睇到動畫會被網民點樣「招呼」，名副其實打定底先。