政情：畀細路寸爆 吳得掂黑面
聖誕節將至，有「吳得掂」之稱嘅教育局局長吳克儉尋日出席兒童發展基金搞嘅聖誕頌歌節閉幕禮時，獲邀上台獻唱聖誕歌，佢一開波已經將支咪轉交畀隔籬嘅基金主席鄭慕智，但鄭慕智見機會難得，特登安排吳得掂獨唱幾句，嚇到吳眼都凸埋。雖然吳得掂五音尚算俱全，但明顯信心欠奉，一直想送走支咪。而幾位小朋友上台一齊高歌時，佢以為可以甩難，點知反被小朋友寸到黑面。
食檸檬 面燶燶
話說吳得掂叫小朋友拎住支咪，但點知撞正個好有性格嘅小朋友，話「唔鍾意拎咪」，吳得掂被迫食完檸檬後即刻面燶燶，但堅持全程將支咪放係前面班小朋友中間，變相幫班小朋友揸咪。活動後又有事發生，原本吳得掂嘅新聞官喺活動前已講明局長唔會答問題，但喺群眾壓力下，吳得掂臨走時焗住走埋大班記者面前，正當大家準備發問之際，佢就拋低一句「聖誕節快樂」就鬆人，自以為好高招，但人哋就會覺得佢玩嘢囉。