政情：激進泛民 要挾離「普」
政改諮詢開始唔夠一個月，由泛民主派組成嘅真普選聯盟（真普聯）下月初就會公布特首普選方案，方案採用民主黨（白鴿黨）同工黨倡議嘅三軌方案，但就無加入激進泛民要求嘅「缺一不可」字眼。據聞激進泛民將以退出真普聯作要挾，仲預先講明如果溫和泛民黨派最終接受無公民提名嘅方案，「票債票償」嘅歷史將會重演，此舉無非都係想逼溫和泛民黨派上轎，更令真普聯召集人鄭宇碩成為磨心。
警告白鴿黨勿再出賣選民
真普聯前日開會討論三軌方案，由於激進泛民誓要喺方案上加入「缺一不可」字眼，以確保任何人只要符合其中一軌，就可入閘成為候選人。鄭宇碩為咗回應激進泛民之餘，又唔想得失溫和泛民黨派，決定向外解釋「三軌方案係一個整體方案」，暫緩處理係咪加入「缺一不可」元素，又話等各泛民黨派先自行討論係咪認同有關方案，元旦後才再開會確定方案。不過，今次暫緩處理，真係拖得一時，唔拖得一世。
莫講話過咗元旦，依家聖誕節都未過，班激進泛民尋日就開始發炮警告真普聯同班溫和泛民黨派。激進泛民團體人民力量同保衞香港自由聯盟（保自聯）尋日就警告溫和黨派白鴿黨唔好再好似上次政改方案咁出賣選民。社民連主席梁國雄（長毛）話，泛民喺政改談判時千祈咪抱住「拎得幾多得幾多」嘅心態，喺爭取終極普選嘅問題上讓步。
拒假普選 或消滅溫和派
人民力量主席袁彌明亦強調，人力唔會接受千秋萬世嘅假普選，仲話如果白鴿黨以為同中央談判就可以有真普選，下次選舉人力唔會再用「票債票償」嘅方式懲罰佢哋咁輕鬆，而會積極諗計消滅溫和泛民黨派，等佢哋企都無得企。保自聯發言人韓連山亦批評溫和泛民接連提出民主倒退方案，要求佢哋喺談判時打醒十二分精神，勿篩走公民提名。今次班激進泛民企得咁硬，唔知鄭宇碩下次開會又點應對呢？