政情：成日揸快車 梁卓偉教壞細路
香港大學醫學院院長梁卓偉（Gabriel）暫時放低幫醫學院搶尖子嘅壓力，尋日出席肝壽基金為肝病兒童搞嘅聖誕聯歡會，落力宣揚器官捐贈。大家都知佢早已簽咗器官捐贈卡，佢講到興起時，即場喺銀包拎張卡出來，自爆自己成日揸快車，非常之曳，但希望曳得來都幫到人，所以隨身帶卡以便有咩意外時，全身器官可以及時捐畀有需要嘅人，認真大吉利是。
常趕場 器官捐贈卡隨身
記得十月底，中環夏慤道天橋有一宗四車連環相撞嘅交通意外，其中就包括Gabriel嘅平治座駕，當時係佢嘅司機揸車，好彩喺車上嘅Gabriel平安無事。殷鑑不遠，點解佢仲唔知驚要揸快車呢？Gabriel解釋話，佢經常要趕場，好似尋日就連跑三場，揸快車趕到都要遲十幾分鐘。Gabriel對住成班小朋友講呢啲嘢，真係教壞細路，所以佢都補充一句，叫大家唔好學佢咁曳！佢又幫醫學院賣廣告，話希望在座病童康復後，可以報讀醫學院，第日同佢做同事，氹到大小朋友笑呵呵。