政情:吳志揚訪港推銷航空城

台灣桃園縣縣長吳志揚尋日率領一班官員來港,為台灣歷來最大投資規模嘅桃園航空城招商推介。吳志揚來頭唔細,佢係國民黨榮譽主席吳伯雄長子,由佢阿爺吳鴻麟開始,吳家三爺孫都做過桃園縣縣長,所以佢任內瞓身搞好航空城,可以話係家族嘅歷史重任。

吳伯雄長子 桃園縣縣長

吳志揚話,今次係佢睽違廿年後再次踏足香港,難得來到,好多城中名人都去捧場,包括香江國際集團創辦人楊孫西、裕華國貨董事長余國春,仲有台北經濟文化辦事處嚴重光、台北貿易中心主任孫至誠及一眾旅港台灣工商界人士。

航空城佔地六千八百幾公頃,係以桃園國際機場及機場捷運線各車站為核心,規劃區域包括物流、金融、住宅及文創科研等。吳志揚透露,尋日會前曾與機場管理局行政總裁許漢忠會面取經,雖然香港正擴建第三條跑道,而上海就試行自由貿易區,但佢相信三者之間可以產生互補作用。

第一手消息請下載on.cc東網iPhone/iPad/Android/Windows Phone Apps