政情：兩大醫學院長 隔空較量
本港兩大醫學院為咗爭收精英學生都出奇制勝，爭收尖子，可算係中文大學醫學院院長陳家亮（Francis）同香港大學醫學院院長梁卓偉（Gabriel）兩大年輕院長隔空較量嘅頭炮。Francis尋日同傳媒茶敍時自嘲，中大增加非聯招收生比例惹來爭議，加上中大心臟科教授余卓文封刀事件，令中大醫學院是非多籮籮，仲講笑話要去灣仔鵝頸橋底打小人，打走啲無謂是非喎。
封刀事件 陳感心痛
Francis尋日以搶眼嘅西裝領呔示人，表現風騷又識講笑，比官仔骨骨嘅Gabriel絕對唔輸蝕。佢仲識玩自嘲，話今年是非多，「上任院長霍泰輝教授話呢個位只係同人食吓飯，剪吓綵，冇乜嘢做，原來都唔係。」數到最令佢覺得難搞嘅，就要數余卓文「封刀事件」莫屬，嗰件事令佢又頭痛又心痛喎。
今年初爆出余卓文封刀事件，Francis嗰陣先上任幾日，好多人牽涉其中，要諗辦法平息風波。作為余嘅上司，Francis只話件事仲查緊，依家兩人日日喺辦公室撞口撞面，外界都估佢哋會面左左。Francis話，見到會打聲招呼，而且院長道門一直打開，余教授有乜嘢都可以隨時搵佢咁話。
梁仍係「鑽石王老五」
講番新年大計，Francis派卡片時就落力硬銷學院出咗新標誌，話係兩塊杏葉組成，象徵為杏林界注入生命力，未來一年最想推動大腸癌篩查計劃。唔講唔知，作為腸胃科專家嘅Francis都有腸胃敵人，佢自爆唔受得奶類，一飲就屙，所以飲咖啡要走奶，或者咁樣仲可飲真啲咖啡嘅味道。
至於Gabriel，雖然平時衣着未及Francis咁搶眼，但都官仔骨骨。Gabriel亦有過人之處，就係精通多種樂器，閒時鍾意玩吓音樂，仲做埋樂團指揮添。不過，Gabriel至今依然係「鑽石王老五」，未有着落，究竟佢係專注港大醫學院院長工作吖？定係真係遇唔到好嘅女仔人家呢？