中環出更：小肥張座駕 明越雙白線
局長出巡勇闖雙白線？一般俗稱「AM車」嘅政府座駕，由於平日載住唔少高官出入，大部分司機開工時都好守規矩，但卓妮前晚揸車行經佐敦時，就驚見負責接載勞工及福利局局長張建宗（小肥張）嘅專用座駕，喺天雨路滑、路面擠塞情況下公然由右至左咁切雙白線，整個切線過程近十秒，舉動更令隨後嘅車輛響按示威抗議。
前晚約七點鐘，天寒地凍加上落住微微細雨，放工一族都急住歸家。卓妮喺佐敦揸車往尖沙咀方向，途經近柯士甸港鐵站、廣深港高鐵西九龍總站地盤對開時，因為塞車而要龜速行駛。突然，一架車牌號碼「AM38」嘅政府座駕有所動作，原來座駕想喺已經逼到沙甸魚咁嘅車龍大軍中，搵位由右線切入左線。
隨行人員指司機「唔覺意」
不過，條路除咗塞車兼濕漉漉，地下條雙白線仲相當顯眼，呢位「AM38」司機喺多架車齊聲響按抗議下，仍懶理「民意」兼罔顧自己揸緊AM車嘅敏感身份，決定勇闖雙白線。成個切雙白線過程險象環生，簡直離譜，究竟司機有咩咁趕時間呢？
經卓妮查探後，原來小肥張當晚聯同多個司局長拉大隊出席政黨位於尖沙咀嘅黨慶活動，隨行人員事後堅稱對司機切雙白線唔知情，歸咎當時路面塞車，唔少車都左穿右插，相信司機切雙白線都係「唔覺意啫！」又急忙護主話小肥張一向要求司機小心駕駛，唔好揸咁快。唔覺意？豈不是博大霧切雙白線？
根據香港法例374G章《道路交通（交通管制）規例》第11條，違反雙白線道路標記規定，可被扣減三分及罰款四百五十元，奉勸司機大佬小心駕駛，安全事大呀！
卓妮