政情：黃業光睇好西班牙房產
由於憂慮政府隨時再出招，香港樓市吹淡風。反觀英美等地產市場，就從谷底大幅反彈，吸引唔少城中名人越洋置業，東華三院總理兼香港鐘表業總會顧問黃業光（John）都話計劃入貨，尤其睇好西班牙房地產。
買磚頭一向最保值，經營鐘錶生意嘅John，最關心環球經濟動向。John喺歐美都有置業，佢話估唔到倫敦優質地段物業彈得最勁，去年至今勁升百分之二十五；美國地產都升咗百分之十幾，相比投資香港地產，增幅極之吸引。展望明年，John話仍然睇好歐美地產，當中一直落後嘅西班牙如巴塞隆拿等城市，過去幾年經歷低潮，依家係吸納首選，預計會升兩三成，美國就睇好紐約及洛杉磯。不過投資海外物業始終有風險，入市前最好做足功課。
講完投資，John不忘為明年訂下玩樂大計，三月將與友人出動超級跑車遊東京，一嘗新賽道滋味，John會出動私伙林寶堅尼戰車，友人就駕駛法拉利及保時捷跑車，一行廿多人浩浩蕩蕩征戰東京，認真大陣仗。