政情：陳恒鑌膽固醇超標唔戒口
時下都市人因工作關係搞到飲食愈來愈唔健康，年紀輕輕就患上高血壓、心臟病等疾病。民建聯陳恒鑌（Ben）透露，佢最新一份嘅驗身報告，揭示佢體內膽固醇超標三倍。不過，佢就依然照去深井食燒鵝，似乎唔擔心會爆血管。
阿Ben早兩日特登揸車去深井裕記食燒鵝，但當佢食咗幾件肥美嘅燒鵝肉後，佢先施施然話自己幾個星期前去做例行身體檢查，點知出咗嚟嘅報告話佢膽固醇超標三倍，醫生叫佢要開始小心飲食，盡量唔好食咁多肥膩嘅食物，以免增加患上心血管疾病嘅風險。
去深井歎燒鵝 專食瘦肉
雖然醫生不斷提醒佢唔好食咁多肥膩嘢，但阿Ben仍然無有怕照食無誤，佢話自己並無食埋燒鵝嘅脆皮同肥膏，仲專揀瘦肉嚟食，加上自己又做多咗運動，相信唔會咁容易出事喎。講起食燒鵝，阿Ben就成個食神上身，佢話裕記烤爐入面嘅炭係自新加坡購入，咁樣烤出嚟嘅鵝會特別好味，食完燒鵝後就要去隔籬嘅茶室歎茶，咁就可以中和燒鵝嘅肥膩喇。