八大商會除咗傳統四大商會之外，仲有中華出入口商會同地產建設商會，呢兩大商會都有多年歷史，獲政府重視都算正常。至於餘下兩大商會中國企業協會同香港中國商會，就係近年至崛起，尤其後者仲係呢兩、三年至突然成立。該兩大商會嘅團體成員全部係「紅色巨企」，例如華潤、招商局、中國太平保險等，擺明係代表在港嘅紅籌國企發聲。
「溝淡」外資影響力
「紅色商會」喺本地插旗，有商會中人分析，咁有助「溝淡」傳統四大商會、尤其係有唔少英資美資企業成員嘅總商會意見，喺政改同廿三條立法等敏感時刻，就可借助「紅色商會」力量替阿爺發聲。事實上，早前商界聯署反佔中，就首次用到八大商會名義，相信背後係經過高人指點。