政情：徐立之怨港大學者只顧攞威

香港大學校長徐立之前日出席一個中學講座，同六百幾位中、小學生分享基因研究經驗。回顧十一年港大校長生涯，佢除咗猛讚自己凝聚力高，成功集合多位學者嘅光芒外，又趁機批評以前「某啲職員」缺乏合作精神，大學者唔事先通知同事就率先向傳媒披露研究成果，仲搞到佢被記者問到口啞啞，唔知佢想畀說話邊個聽呢？

徐立之回想十一年前踏入港大時，雖然深感成班學者好叻，但係就唔多團結。佢舉例話，記得有次被記者問到「口啞啞」，原因係有學者率先向報紙披露研究成果，但係事前並無知會佢，佢話此舉明顯缺乏合作精神，希望有關同事明白「分享」嘅重要性喎！講到底，徐立之都係批評緊啲學者只顧自己攞威，同埋唔尊重佢呢個校長啫。

至於對下任港大校長馬斐森嘅寄望，徐立之就話自己唔會「指指點點」，又指港大需要「新陳代謝」，聲言自己嘅彈藥已經用盡，希望新任校長可以為學校注入新思維喎。問到二○一一年發生嘅「八一八事件」係咪佢校長生涯最大嘅污點？徐立之即刻收起笑容猛話唔答，佢講學者是非又唔講自己，似乎唔係好啱數喎。