政情：真普聯乾塘 泛民閂水喉
年初成立嘅真普選聯盟（真普聯），雖然一直有泛民主派科水支持，但自從佢哋舉行全港簽名日及委託港大民意研究計劃做咗兩次大型民調後，財政一下子陷入乾塘邊緣。咁啱民陣同真普聯合辦嘅元旦遊行將至，按慣例參與遊行嘅團體要將籌款總收入嘅百分之十上繳畀主辦團體，真普聯召集人鄭宇碩為求撲水，決定今次加碼「抽水」達百分之十五，搞到唔少政團群起反對，反映原來錢係重要過爭取真普選。
各黨只願意交5%
真普聯前晚舉行每周例會，討論元旦遊行具體安排同各黨工作分配。據了解，鄭宇碩喺會上透露聯盟金庫只得番三十多萬元，但仲有唔少街數未找，包括上月委託港大民意研究計劃所做嘅立法會選舉民調，花費約為八至十萬元。正由於真普聯喺公布聯盟最終特首普選方案後要再做民調，所以除咗要抽取早前七一遊行嘅百分之十捐款外，嚟緊元旦要額外加多百分之五嘅捐款，以彌補真普聯來年使費。
不過，各政黨代表聽完鄭宇碩嘅建議後即時牙痛咁聲，話「抽水」抽足百分之十五實在太多，辛苦籌錢都只係得番個桔，反建議各黨只需上繳百分之五，不加反減。投訴完一大輪後，社民連同人民力量堅持唔肯「科水」，所以最終上繳金額仍要商討。估唔到佢哋加入真普聯時就係威係勢，講到錢就即刻閂水喉，唔通佢哋覺得呢個世界有免費午餐嘅？
普選方案傾唔掂數
真普聯當晚亦有討論特首普選方案具體內容，雖然白鴿黨同公共專業聯盟肯喺方案中加入公民提名元素，但就唔肯加埋「缺一不可」四個字，相反社民連同人民力量就堅持一定要加埋，話咁先可以突顯佢哋爭取公民提名嘅決心。雙方喺討論期間一度處於僵持狀態，社民連梁國雄更即時「反枱」鬧大家嘥時間。
雖然鄭宇碩反建議方案可加入「現階段缺一不可」等字眼，但各黨仍然唔肯收貨，最後大家決定喺下周六召開特別會議，再次討論方案內容，但要得出一個各黨可接受方案，睇怕好難囉。