政情：一擲成名 全城瘋搶「路姆西」
社民連喺地區諮詢會向特首梁振英掟毛公仔「路姆西」（Lufsig），由於係狼公仔，名字又係廣東話粗口諧音，令路姆西一擲成名熱爆全城，市民爭相到售賣路姆西嘅宜家家居搶購，三間分店共六百幾隻存貨一日之間被清倉，宜家尋晚曾經補貨，但隨即又被搶購一空。網上仲有人乘機將路姆西炒賣，其實呢隻狼公仔唔係限量推出，有炒賣企圖，分分鐘炒燶o架。
旋即斷貨 炒家湧現
呢隻大熱狼公仔售價九十九毫九，因為參加助學活動，所以有八五折，前日已有搶購潮，消息一傳十、十傳百，沙田分店尋日未開門已有十幾人排隊。九龍灣分店更出現二百人人龍，聽聞有男子喺九龍灣分店掃咗二百隻，最終令路姆西貨架空空如也。銅鑼灣分店更誇張，晚上八點返新貨時，每位市民限買一隻，而且只得一百二十個籌。宜家發言人呼籲市民唔好再到分店搶購，新一批路姆西最快明年一月運抵香港。
至於點解咁受歡迎，喺九龍灣排頭十位嘅黎小姐老實唔客氣，話路姆西似粗口發音，公仔又可以大力打、大力掟，可以發洩不滿。不過亦有溫馨場面，有市民話女友指定要一隻路姆西作求婚信物，但佢去到九龍灣分店已經大排長龍，好彩得有心人相助讓出路姆西，先令佢完成任務。