本來廉政公署一直都係打擊貪污嘅橋頭堡，點知「貪湯」前廉政專員湯顯明上年被揭發，同佢老細「貪曾」前特首曾蔭權爵士一樣，都係「貪盡海陸空、食盡省港澳」，畀政府、廉署同立法會政府帳目委員會「三路追殺」，可謂做衰廉署個名。廉署明年踏入四十周年，二月會舉行開放日，相信市民都好想知道貪湯買嗰啲茅台擺咗喺邊同佢批准買返嚟嘅「全署禮物」魚蛋牛腩。如果有份食嘅話，又會喺邊度齊齊享用呢？
廉署明年二月十五日（星期六）、十六日（星期日）同二十三日（星期六）舉行開放日，開放部分設施畀公眾人士參觀，包括更新後嘅廉署展覽廳、模擬錄影會面室、列隊認人室、廉署人員使用嘅槍械設備等。參觀行程約個半鐘，由廉署人員隨團講解。
睇番資料，廉署對上一次搞開放日係二○一○年，相隔四年再搞，相信貪湯喺廉署留下唔少「痕迹」，好似貪湯收埋收埋都有唔少禮物，或者署方可以諗諗加埋入個行程，展示吓啲禮物，咁就一定吸引到好多人嚟參觀嘞。