政情:若爭輸地 陳新滋「憑良心做事」

政府企硬要將九龍塘聯福道嘅前李惠利校舍地皮起豪宅,但為咗紓緩新學制下大批大學生唔夠地方上堂,將空置校舍借畀同樣有意爭奪地皮嘅浸會大學。殊不知浸大未擁其地,已經擺出「好客」嘅姿態,喺度大搞開放日,又借機同傳媒講話全校上下都一致支持保留李惠利用地,反對政府建豪宅。校長陳新滋仲話有信心下個月城規會討論佢地興建宿舍及中醫院嘅方案時會有人支持添!不過問佢如果爭取失敗嗰陣會唔會履行承諾辭職,佢就突然變得含蓄,話「會憑良心做事」。

浸大尋日請來一班公公婆婆撐場,提供免費中醫保健飲品、中醫義診等,力銷如果浸大用塊地起中醫教學醫院就可以更加方便佢哋保健養生。陳新滋又出言恐嚇,話政府起豪宅只會令住戶怨聲四起,因為相鄰嘅浸大成日都有學生搞各類活動,話買完都未必會住得開心。

指建豪宅對社會不公

佢又話政府自行到城規會申請起豪宅已經觸發二萬幾人提反對申述,而九龍城區議會及立法會教育事務委員等亦都表態反對,強調塊地變豪宅會對社會老百姓都會唔公平。睇嚟陳校長嘅抗爭,高明咗喎。

第一手消息請下載on.cc東網iPhone/iPad/Android/Windows Phone Apps