政情：愛港之聲 預告連串攻勢
愛港之聲尋日喺尖沙咀舉行周年聯歡晚會，慶祝團體成立一周年。召集人高達斌話，愛港之聲會因應政改諮詢而積極發聲，農曆新年前會舉行首場論壇收集意見，諮詢期完結前更會公布佢哋提倡嘅政改方案。對於民陣會喺元旦日舉行遊行，佢哋就會喺政府總部旁嘅添馬公園搞嘉年華活動，以及宣布成立新網台。至於會唔會派人參加下屆區議會同立法會選舉，高達斌話愛港之聲現時有約八百名會員，唔排除有人想參選喎。
提倡政改方案 成立網台
高達斌喺晚會致詞時回顧成立愛港之聲嘅原因，佢話特首梁振英（CY）上任後推行多項措施改善經濟民生，可惜有港人對中國國情存有誤解，不時拖政府後腿批評CY，自己同一班志同道合之士對呢啲行為愈來愈睇唔過眼，後來更決定唔再做沉默嘅一群，要為支持政府嘅市民發聲。雖然高達斌非常亢奮咁講足十幾分鐘，但台下唔少觀眾繼續傾偈同飲酒，只喺適當時候齊聲讚好附和吓。