中環出更：少人學丑角 羅家英失落
中國傳統戲曲日漸式微，近年粵劇或京劇舞台上出現唔少電影式嘅大製作，或者將原本以花臉演繹嘅角色變成靚仔扮相，目的係迎合觀眾口味。粵劇大老倌羅家英日前喺油麻地戲院出席講座時感慨話，咁做令佢好失落、唔舒服。同場嘅著名京劇大師尚長榮就批評係「走火入魔」，兩人都話戲班唔應該向潮流投降。
當日喺西九文化區戲曲中心主辦嘅講座，由羅家英及尚長榮對談《不同行當的成名之路》，吸引數十名戲迷入場分享。所謂「行當」係指人物角色，按性別、性格及地位等特徵，透過化妝及服裝等方式予以區分，例如生、旦、丑等等。擅長生角嘅羅家英笑笑口話，當年佢入行做文武生，係因為佢天生靚身材同靚聲喎！
戲曲創新 花臉竟變靚仔
不過佢感慨話，近年好少人學丑角，因為戲份少、扮相唔靚，舞台上只能相繼出現靚仔扮相嘅曹操及楚霸王，佢直言好失落。佢又擔心，日後要搵齊人做場《三國演義》都好難，因為個個爭住做小生，已搵唔到人做張飛、關公及曹操喇！
來自京劇世家嘅尚長榮專程來港出席講座，佢父親尚小雲曾與梅蘭芳等人並列為京城「四大名旦」，難怪阿姐汪明荃、知名粵劇小生李奇峰及囡囡李沛妍等人都去捧場。獲獎無數嘅尚長榮擅扮花臉，將曹操、楚霸王等歷史梟雄演得淋漓盡致，對談時佢傾得興起，幾度曹操上身，哼唱起來，台下戲迷聽得入迷，拍爛手掌。尚長榮都話，傳統戲曲應該回歸基本功架及唱功，各行當嘅劃分源於生活，並經過長年累月淬煉，此乃戲曲絕妙之處，唔可以因為要創新而走火入魔。
羅家英趁機叮囑擔任主持嘅西九文化區管理局表演藝術行政總監茹國烈，要立足傳統，千祈咪玩花臣。尚長榮仲同羅家英約定，待四年後西九戲曲中心落成，佢哋要合作唱台好戲。
卓妮