中環出更：邀四叔捐地 仁濟打鄉里牌
恒基地產主席李兆基（四叔）近排捐地停不了，繼捐贈屯門藍地一幅十萬呎地皮畀博愛醫院之後，又再打算捐出隔籬一幅四萬呎官地，四叔仲話睇吓邊間醫院或機構有興趣，可以搵佢傾傾，件事引起仁濟醫院極大興趣。早前仁濟董事局主席梁昌明、副主席蘇陳偉香（Susan）等一眾董事局成員開生日會時，眾人對呢個新鮮熱辣嘅話題顯得興致勃勃，咁啱仁濟總理陳李詠詩（Jenny）係順德聯誼會永遠榮譽董事，同四叔係鄉里，眾人一於推舉佢出面穿針引線，仲話要趁快喎！
Jenny話，佢父親李塔源係順德聯誼會副主席，同四叔識咗好耐，希望靠鄉情搭夠，搶先一步為仁濟爭取到呢塊地。仁濟行政總裁黃偉健就話，佢哋喺新界西提供好多社會服務，由於人口老化，老年嘅智障人士護理需求愈嚟愈大，如果可以爭取到塊地，希望可以提供智障人士安老院。咁啱博愛醫院喺隔籬將提供可容納二千人嘅安老院，到時可以起到相輔相成效果。
董事局齊賀11月壽星
當晚聚會係仁濟董事局十一月壽星嘅生日會，牛一嘅有梁昌明，仲有Susan、嚴徐玉珊及馮卓能三位副主席。明年將接任主席嘅Susan話，今年經濟不景令籌款添難度，幸好有好多不知名嘅善心人士捐款，最驚喜係佢哋放喺荃灣一間寺廟嘅錢箱，竟有一張十萬元支票，而且最終過到數，證實唔係被整蠱。
當晚座上客仲有總理葉恭正（Paul）及太太Annika，阿Paul旗下間KCMG賽車公司啱啱喺澳門格蘭披治大賽車中，贏得青年冠軍方程式系列賽冠軍，更加要飲多兩杯慶祝吓喇！
卓妮