政情:雙貪佗衰家 臭史傳到巴拿馬

俗語有話醜事傳千里。「貪曾」前特首曾蔭權爵士同「貪湯」前廉政專員湯顯明嘅貪腐醜行唔止令本港市民憤怒,更已傳遍中外。廉政專員白韞六最近去咗巴拿馬共和國,但佢都放唔低「貪氏兩兄弟」, 喺開國際反貪會議時提到,廉署對多宗前官員嘅調查引起公眾關注香港貪污情況。搞到外國都知香港有貪腐問題,雙貪真係佗衰家喇。

白韞六外訪宣傳反貪

貪曾同貪湯被踢爆連串貪腐醜聞,而前政務司司長許仕仁亦因涉嫌貪污被廉政公署檢控。白韞六前日喺巴拿馬城出席國際反貪局聯合會年會,佢喺會上分享香港嘅反貪經驗時就提到,廉署最近多宗涉及前任及現任高級官員同上市公司高層案件嘅調查同檢控引嚟傳媒廣泛報導,亦引起公眾關注香港貪污情況。

雖然雙貪令香港蒙羞,不過白韞六就話,根據廉署分析,香港嘅貪污仍繼續受到有效控制,而有關檢控亦正正印證咗不論涉案者係咩背景、地位同身份,廉署都會嚴謹依法、不偏不倚咁辦案。

第一手消息請下載on.cc東網iPhone/iPad/Android/Windows Phone Apps