政情：中環出更：被問政改 千福變唔覆
嚟香港上任後通街走、去茶餐廳歎奶茶又談論香港嘅普選嘅美國駐港總領事夏千福，尋日連走兩場，去完反性暴力起動禮，又去一個美國飲食文化交流活動。不過佢唔知係學乖咗定係未到時候，尋日被問及政改問題時，佢全部唔答。
尋日係聯合國國際消除對婦女暴力行為日，有地區團體搞咗個教育活動周起動禮，請夏千福做主禮嘉賓。喺另一場合，夏千福換咗成套廚師制服，出席美國飲食文化交流活動，欣賞美籍廚師Ben Ford即場煮銀鱈魚伴番茄汁及波蛋。佢話今次出席活動，係想宣傳美國飲食文化唔係淨係有漢堡包，成個推銷員咁款，佢又話自己會煮嘢食，偶然仲會用雞汁。兩場活動被問及政治問題，夏千福都全部唔答。
來港履新頻指手畫腳
呢位前北韓六方會談特使七月來港履新，之後會見過唔少人，又通街遊覽，仲話支持香港有真普選，好唔客氣地指手畫腳。政改諮詢都未開始，佢尋日唔講嘢，唔代表今後唔就香港政改發言囉。
卓妮