中環出更:家族辦展覽 利子謙驚喜

名廈商戶林立嘅銅鑼灣,除咗係遊客掃貨必經之地,該區嘅利園山道一帶,上世紀六十年代前一直係利希慎家族嘅私家地段,閒人免進。家族集團為紀念買地進駐銅鑼灣九十年,特別喺旗下三個商場舉辦展覽,齊齊時光倒流九十年。家族第三代後人利子厚嘅哥哥利子謙(Harry),尋日更誤打誤撞突然現身展覽,仲分享家族趣事添!

Hysan Place、利園及利舞臺尋日變身華麗復古舞台,除咗展出大量相片同歷史真迹,展現利園山近百年來嘅巨變,更將上一輩港人嘅集體回憶「利舞臺劇院」嘅旋轉式舞台以模型重現原址。展覽嘅一角,卓妮突然發現已喺紐約定居多年嘅Harry回港參觀展覽,梗係即刻上前打個招呼啦!

誤打誤撞 細說往事

不過,原來Harry對展覽毫不知情,只係返港休息行經自己地頭嘅利園,先發覺自己成為展覽嘅歷史見證人,既驚且喜。問到對香港生活嘅回憶,Harry話最懷念嘅一定係家族位於堅尼地道、現址已拆卸改建為竹林苑嘅大宅。Harry記得當年家族每逢開派對,成班細路都會聚埋一齊打乒乓波,圍威喂已經好開心。Harry更透露,以前係利舞台戲院嘅擁躉,成日入場睇戲o架!唔知Harry當年使唔使買飛入場呢?

除咗重現懷舊舞臺,場地仲放置咗唔少當年利家大宅嘅家具擺設,每件都係中西合璧、貴氣非凡,兜個圈都仿佛置身昔日大戶人家嘅豪宅。現身展覽為大家細說當年嘅香港歷史博物館前館長丁新豹話,利希慎家族自十九世紀起已經係香港開埠嘅名門望族,及後亦係發展最蓬勃嘅望族。

卓妮

第一手消息請下載on.cc東網iPhone/iPad/Android/Windows Phone Apps