政情：今日你上鏡：史樂山伴名主音遊馬場

早幾日馬場出現一位稀客，就係六十年代美國知名搖滾樂隊Beach Boys主音歌手Bruce Johnston，由國泰航空行政總裁史樂山陪住一齊入場。Bruce着到官仔骨骨，唔知仲以為係邊間跨國公司高層，事關史樂山明年三月將升呢做主席，一口氣兼任太古集團四間上市公司掌舵人，唔講得笑。被粉絲形容係地球上最正樂隊嘅Beach Boys仍然活躍於舞台，上月啱啱喺美國亞拉巴馬州開完演唱會，下月初又穿州過省展開一連串音樂會，唱到明年一月下旬至落幕。難得十一月冇騷，莫非Bruce趁空檔來香港玩吓？