政情：中環出更：議員常撻Q立會贏波靠「實Q」
立法會足球隊尋日喺沙田運動場舉行復會後首場賽事，大戰由年輕人同老波友組成嘅「老波骨」球隊。立法會隊波經常都話唔夠人要請外援幫手，尋日佢哋都係依舊「最低消費」得六個議員參加，再加多十八個外援，包括多名立法會保安員，莫非佢哋諗住輸人唔輸陣？結果不出所料，全場要靠保安員擔大旗入波，班議員只係入得一球，仲經常埋門撻Ｑ，好彩最後成功以四比一延續不敗神話。
立法會足球隊六名議員之中，除咗經常落場嘅漁農界何俊賢、陳克勤、勞工界郭偉強、梁志祥同資訊科技界莫乃光外，多年無踢過波嘅旅遊界姚思榮亦落場踢番幾腳，腳法同姿勢都算係有紋有路。
要出動特權法
不過，姚思榮踢咗十分鐘就頂唔順離開草地坐埋一邊休息，又話自此以後會下定決心做多啲運動減肥喎。
至於郭偉強就差唔多踢足全場，但經常喺埋門一腳先至撻Ｑ，唔係射中門柱就係射得太高，激到隊長克勤仔喺場邊猛話要換人，又講笑話要出動俗稱「尚方寶劍」嘅特權法，調查郭偉強係咪因為飲咗對手嘅汽水而放軟手腳。不過，比賽接近尾聲，帶住個波嘅克勤仔準備喺龍門前大腳一射，但點知突然腳軟射偏咗半米入唔到波，之後佢都唔敢再要求用特權法查郭偉強喇。
立法會議員上陣，秘書長陳維安當然有到場支持，但戴住黑超嘅佢只係一直蹺埋對手喺場邊睇熱鬧，唔肯換衫落場一顯身手。佢解釋，自己左手啱啱先好番，唔想因為踢波而令舊患復發喎，但就被何俊賢反駁話，踢波淨係用對腳而唔使用手，所以唔使驚會整親隻手。
卓妮