中環出更：胡應湘八獲大學榮譽銜頭
香港教育學院尋日舉行學位頒授典禮，並向三位首批哲學博士頒發學位，令教院升格大學邁向一大步。此外，包括合和實業主席胡應湘（Gordon）在內嘅四位傑出人士，則獲頒授榮譽博士學位。Gordon笑笑口話，今次已係佢第八次獲不同大學頒發榮譽銜頭，佢趁機強調教育嘅重要性，問佢依家政府對教育投放嘅資源夠唔夠？佢就大耍太極要問特首喎！
教院頒授禮 岳父都捧場
胡太郭秀萍及囝囝胡文新（Thomas）都有去捧場，卓妮發現有位老人家坐喺胡太同Thomas中間，不時舉機影低Gordon喺台上嘅一舉一動，原來佢係胡太嘅爸爸。胡太笑稱，Thomas同外公生得好似樣，佢自己就似爸爸，即係三個人都好似樣。卓妮望真啲，佢哋三個人嘅側面又真係幾似樣喎！
Gordon話，睇返中外歷史，凡係文明昌盛嘅朝代，一定係教育事業興旺，例如中國有孔子、孟子，又譬如盛產哲學家嘅古希臘等。講講吓，佢話香港現時教育支出佔整體預算百分之二十五，但問佢夠唔夠，佢就將個波推畀特首，莫非驚講錯嘢？
教院校長張仁良就話，教院首批哲學研究博士、首屆修讀非教育性學科課程嘅學生尋日畢業，意味教院已正式成為教育及多元學科並重嘅高等學府，令爭取升格嘅努力向前邁進一大步。張仁良又趁機呻話，今時今日老師唔易做，壓力好大喎。尋日獲頒榮譽博士銜頭嘅仲有Michael Fullan教授、Lee Shulman教授及跨國界獻愛心嘅Christina Nobel。
卓妮