代理日本電器起家嘅信興集團，連日舉行多場派對慶祝六十周年，勾起唔少城中名人嘅集體回憶。長實執董趙國雄（趙樓神）記得細個住唐樓時，屋企買咗第一個電飯煲，逢親煮飯時左鄰右里都爭相去「參觀」，場面好難忘。信興集團副主席蒙德揚（David）就話第一代黑白電視機最特別，事關部機有門仲有鎖，依家邊有呢種設計吖？

前日信興喺金鐘一間酒店舉行鑽禧誌慶酒會，近千名賓客到賀，現場展示多款已停產嘅電器，似足行入時光隧道。

趙樓神話，上世紀五十年代，佢住喺四層高嘅唐樓，佢屋企係成棟樓幾十個家庭之中，第一個用電飯煲取代瓦罉煮飯。原本幾兄弟姐妹驚煲燶飯被阿媽鬧，都唔會主動幫手，但係有電飯煲後個個搶住洗米煮飯，鄰居群集圍觀電飯煲卜卜跳盛況，依家諗起仲好回味。

尋日沙田馬場舉行樂聲盃賽事時，主人家繼續玩懷舊，以懷舊造型收音機贈送賓客。香港大學校務委員會主席梁智鴻笑笑口話，佢讀大學時正正係聽呢款收音機。中華總商會前會長蔡冠深太太關穎琴（Janice）都幫襯咗蒙家多年，除咗屋企冷氣機、抽濕機外，佢最近仲發現日本有家用廚餘機，可惜仲未引入香港，話遲啲去日本買番部。

潮流興減廚餘，卓妮即刻問David點解仲唔引入廚餘機？點知David耍手擰頭話時機未成熟。唔信？佢話大家只要去望一望三個廢物回收箱就明白，入邊乜都有，分類亂七八糟，何況處理廚餘？所以話，生意人真係要數口好至得。

卓妮