中環出更：李文恩近身青年工業家
由香港工業總會主辦嘅香港青年工業家獎，今年誕生六位青年工業家，包括理文化工董事總經理李文恩（Norman）、「關島王」陳守仁嘅兒子聯泰集團財務總監兼執董陳祖恒、「耳機大王」中華廠商聯合會副會長楊志雄嘅囝囝富士高執董及首席策略總監楊少聰等人，而年度傑出工業家獎就由長江製衣主席陳瑞球獲得。
早前工總舉行頒獎典禮時，各路英雄齊集，Norman獲佢爸爸理文集團主席李運強及外父郭燦耀率領全家去打氣，陣容鼎盛。平時李文恩唔多講生意經，原來佢好唔簡單，初時加入集團接觸手袋製造業務，後來成功開發以甲烷氯化物為主嘅製造及研發業務，於是另創理文化工，至今公司業務喺內地已穩佔百分之十五嘅市場。
今次提名Norman係其外父郭燦耀，郭燦耀亦喺九七年獲頒青年工業家獎，今次Norman不負眾望，一門雙傑加倍開心。Norman太太Lorinda甜絲絲大讚丈夫工作好勤力，兩人拍拖時正係丈夫拚搏期，試過一個月只見一次面，但明白丈夫咁忙都係為事業，所以都冇詐型。
陳瑞球獲獎 名人齊撐場
陳瑞球亦有好多重量級支持者，包括中文大學校長沈祖堯、工業家蔣震、前立法會議員梁劉柔芬等人，球伯嘅囡囡廠商會副會長陳淑玲亦陪伴左右。至於楊志雄就讚囝囝不停追求耳機嘅完美技術，適逢智能手機風行，令佢「耳機大王」地位力保不失。
卓妮